生日快樂

前幾日細女去左泰國，我去她家教孖寶做功課。

大B見到我，立即取出玩具反斗城本書出來，好正經咁同我講：婆婆，我就梨生日啦，你送咩生日禮物比我？我問佢：咩唔係送生日常蛋糕咩？（每個孫兒開生日會都是我俾錢買蛋糕）大B諗左幾秒，我想要禮物，指住本書中的一件玩具，我想要呢個鐵甲人！嚇！柒百幾？我跟著問佢：婆婆都是就梨生日喎，你是否請我食步飛？（舊年佢出二百元請我）佢話：要問下媽咪喎！我問佢有無錢？佢話佢大把錢！不過，的錢留番買二年級的書！

前日同細女飲茶時，講起呢個牙擦仔，我將之前果番話說給女兒聽。今日同細女飲茶時，佢話尋日問孖寶，送什麼禮物俾佢，大B話買生日蛋糕俾媽咪，女兒問佢，你的錢咩唔係要用來買二年級的書嗎？大G話：咁等我出晒買蛋糕既錢啦！大B很快咁問家姐，你的錢唔駛留番買三年級的書嗎？真係被佢激C，對住佢唔知嬲定笑！結果兩姐弟每人出150元，送生日蛋糕比媽咪！

在隨意窩做的生日卡！

煩惱

呢幾日都要繞一個圈才能回家！每次去開心van仔度都話系統繁忙，要在我相片下指住blog，才可返屋企！寫完文字又唔俾我出公仔，又是因系統繁忙！有無咁忙呀！佢一句繁忙令到我煩惱！開始懷念以前隻虎呀！雖然有時都會頑皮唔聽話，但而家呢個重頑皮，成日扭計，一時不能發表，一時無晒我寫既野，而家唔出公仔！谷哥果邊又複雜，成日玩我！新居又靜悄悄，行宮雖多，無處是樂土！搞到我意興闌珊，無心機寫野！ 今日很倦，走去按腳，師父話我好倦，對腳很硬，淋巴不通，我都知，呢幾日成個機械人咁款。個按摩師很好人，本來很忙，佢見我咁倦，叫下一個客遲二十分鐘才來，幫我按三十分膊頭，怕我痛，用油幫我推，又推又按後舒服晒！按完出來成個人輕鬆左，幾錢？當然貴過深圳啦，但勝在慳車錢同時間。一個半小時盛惠198元，見師傅好人，打賞30元。財散人安樂！懶人做運動。

孖寶

細女跟公司高層去泰國開會，我今日去她家教孫兒做功課。佢對孖寶是大G與大B，大G很乖，很用心做功課，很緊張自己的成績，可惜資質唔算叻，好在肯做同肯聽人講。今日教佢做數學，一睇之前做果的數，唉！錯晒的唔應該錯既地方！借位忘記減，進位忘記加！做完功課同佢玩棋，第一次玩波子跳棋又唔算差喎！以前只玩食棋，今日我要佢學玩跳棋。跟著玩五子棋，佢話好難玩，我教佢如何佈局，如何截住對方的棋，佢贏左後開始有心機玩，我話佢睇棋盤唔夠全面，只顧自己無睇清楚對方，每行一步都要睇清楚有無危機，要用腦諗清楚如何下棋！佢話諗唔到，因為佢個腦好細！腦細是因為佢人細！好似有道理喎！

佢細佬大B性格與她相反，呢隻仔牙擦，唔聽人講，有佢自己既一套，女兒話叫佢寫幾句英文詞語，寫左成星期都唔識默，於是取出教授的cd睇，買合玩具同佢玩英文生字，將英文句子寫在硬卡紙，貼在大門後，每日都望到，三日後竟然識晒！呢隻仔是另類教學。今日同佢溫中文，星期二默書，問佢識未？識啦，好簡單之嘛！既然識就默啦，又真係識喎，佢好牙擦咁話，都話無野可以難倒我架啦！

做數學功課，佢話點解老師俾的咁容易既數佢計！佢今年讀小一，我同細女都擔心佢應付唔到，誰知佢第一次默中文竟然有92分，早幾日默英文都有82分！佢話媽咪估錯題，（每次有幾個生字是課外題）所以令到佢咁低分！

今日佢話我知，佢是黑白棋大王，因為贏左媽咪同爸爸！還教我玩圍棋！俾埋本圍棋書我睇！佢當然唔識玩啦，我都唔識！不過都聽佢講，但呢隻仔坐唔定，無耐性，識少少就牙擦擦！

私房菜

今日與四女一齊去街市買菜，見到有池魚賣，我有幾十年無食過啦！唔知點解突然好想食！（我記起啦，早幾日發夢食池魚呀！夢境成真，今日圓夢）唔貴喎，十元三條，買左三條。孫兒喜歡食魚，買左條唔知咩班，剛剛游完水上岸休息，60元一條。買完魚買菜，女兒話有菜心，但我又突然想食椰菜花，佢地唔食架。於是買椰菜花炒牛肉。女兒約左時間飲碘，所以不能食海產。佢買洋蔥炒豬扒。今日開飯有五碟（食送），我只食我的私房菜！親自下廚架！好耐無煮既白烚魚，女兒問可以咁煮既咩？當然可以，很好味！女兒話池魚很有魚味，不是腥味呀！是魚味喎！以前阿媽成日買架，我有三十年未食過！

奇怪

今日返來睇下，見有網友留言，想回覆時唔得架！不知是何原因！佢又玩我呀！

中秋節

中秋節 20/9/2013 14:23:12 網誌分類: 家庭樂

尋日中秋節，全部人去四女家食飯，大廚當然 係佢啦，我做咩？財政部長！ 尋日餐飯唔只是做節咁簡單架，還為四女同細女 慶祝生日，佢地農曆生日只差四日，年紀差四年， 好巧合！還有一個特別要慶祝的原因，細女寫左一篇 關於醫學的學術文章，竟然入左圍，可以去外國參加 一個學術性的國際交流會議，佢好開心！文章是碩士 考試時寫既，教授覺得佢寫得好，問佢參加比賽嗎？ 結果參加比賽而入圍，不是公司派佢去。意義不同， 證明佢有實力，所以佢好開心！我都很開心！ 尋日食咩？做節一定有雞同燒肉。買左兩條沙巴 龍（？），兩斤海蝦，（好貴呀）幾隻唔知咩 花蟹，細女買羊扒同青口，我買兩罐安記飽魚。 尋日分工合作，飽魚由大女婿加工，（好味） 細女煮白汁青口，（各人讚不絕口）四女焗羊扒， 蒸蟹，煎蝦，一半白灼俾小朋友食，姐姐蒸魚同灼菜。 食完飯照例與小朋友落公園玩，我拜完神就一齊 賞月。細女好開心，今年好豪地買左8個日本水蜜 桃，（每個88元）兩個水晶梨，大家都話唔捨得買！ （因為窮呀嘛）我買提子，水晶梨，（唔記得細女已買） 紅柿，碌柚，芋仔，至於月餅？勁啦！四女買兩個雙黃 豆蓉俾我，雙黃紅豆沙俾大家。我的仔女一定要食奇華 雙黃紅豆沙架！媳婦帶半島奶黃同國金軒迷你月餅， 大女就有冰皮迷你月餅。 既然是有人生日，當然要有生日蛋糕啦，因為太多野 食，所以四女自制迷你朱古叻慕絲！小朋友齊齊唱 生日歌！ 尋晚大家都玩到很夜才各自回家！

回應(2)

中秋節快樂

很快就中秋節啦！祝各位網友中秋節快樂！